ՀՀ դեսպան Աշոտ Հովակիմյանը մասնակցեց Դուբրովնիկ քաղաքի տոնին՝ Սուրբ Վլախի Փառատոնին

03 փետրվարի, 2020

Փետրվարի 2-3-ին Դուբրովնիկի քաղաքապետի հրավերով ՀՀ դեսպան Աշոտ Հովակիմյանը մասնակցեց Դուբրովնիկ քաղաքի տոնին՝ Սուրբ Վլախի (Սուրբ Բլասիուսի) Փառատոնին, որի բացմանը ներկա էր Խորվաթիայի գրեթե ողջ քաղաքական, մշակութային և եկեղեցական էլիտան:
Սուրբ Բլասիուսը (Վլասիուսը, Վլախը) ՝ Սեբաստիա քաղաքի 3-4-րդ դդ. հայ եպիսկոպոս էր, որը նահատակվելուց հետո, հռչակվեց համաքրիստոնեական սուրբ: Հայազգի եպիսկոպոսը դարեր հետո դարձավ Դուբրովնիկի հիմնական սուրբ, քաղաքի պատրոն, այն պատկերված է քաղաքի դրոշի վրա, նրա քանդակները տեղադրված են քաղաքի բոլոր անկյուններում: Դուբրովնիկի Սուրբ Վլախ եկեղեցում են այսօր պահվում հայ սրբի գլուխը, կոկորդը, աջ և ձախ ձեռքերն ու ոտքը։ Քաղաքում բոլորը գիտեն, որ նրանց սուրբ Վլախը՝ հայ էր: Դուբրովնիկի կենտրոնում է տեղադրված հայկական խաչքար:

ՀՀ դեսպանը ներկա գտնվեց Փառատոնի բացման արարողությանը, հանդիսավոր պատարագին և թափորին, Դուբրովնիկի քաղաքապետի կողմից տրված ընդունելությանը: Ընդունելության ընթացքում ՀՀ դեսպանը կարճատև զրույցներ ունեցավ Խորվաթիայի վարչապետ Անդրեյ Պլենկովիչի, Խորհրդարանի արտաքին հարաբերությունների հանձնաժողովի նախագահ Միրո Կովաչի, տարբեր պաշտոնյաների և քաղաքական գործիչների, արվեստագետների և գործարարների հետ:
Ա.Հովակիմյանին ընդունեցին Դուբրովնիկի քաղաքապետ Մատո Ֆրանկովիչը և Դուբրովնիկի քաղաքային խորհրդի նախագահ Մարկո Պոտրեբիցան: Հանդիպմանը քննարկվեցին Հայաստանի հետ Դուբրովնիկի մշակութային և գիտական համագործակցության հեռանկարները, զբոսաշրջության ակտիվացումը, քաղաքների միջև գործընկերային կապերի ստեղծումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր